Një punë e zakonshme në arë është ndërprerë nga një zbulim i pazakontë në fshatin Tërpezë e Ulët të Malishevës, ku një qytetar ka hasur në një mjet të dyshimtë shpërthyes, që dyshohet të jetë granatë dore, raporton Gazeta Sinjali.
Burimet e Sinjalit bëjnë me dije se mjetin e dyshimtë e ka zbuluar F.Krasniqi, derisa po kryente punë në pronën e tij.
Ngjarja ka ndodhur të dielën, më 25 tetor 2026, rreth orës 10:30, kur 50-vjeçari, teksa po punonte pranë një gardhi në arën e tij, ka vërejtur një objekt që i ngjante granatës së dorës.
Pas këtij zbulimi, është njoftuar Stacioni Policor në Malishevë, nga ku një patrullë është nisur drejt vendit të ngjarjes.
Zyrtarët policorë kanë kontaktuar qytetarin që kishte gjetur mjetin dhe kanë marrë informacionet për rrethanat në të cilat ishte zbuluar.
Për shkak të rrezikut të mundshëm, Policia ka siguruar perimetrin dhe ka kërkuar ndërhyrjen e njësisë së specializuar për trajtimin e mjeteve shpërthyese (EOD).
Për rastin është njoftuar edhe Prokurori i Shtetit, me udhëzim të të cilit është përpiluar shënim zyrtar lidhur me ngjarjen.
Në informacionet fillestare nuk është konfirmuar ende lloji dhe gjendja e mjetit të dyshimtë, as nëse ai është larguar nga vendi i ngjarjes.
Rasti është evidentuar si “Gjetje e mjetit të pashpërthyer”.