Policia e Kosovës ka arrestuar një person në Prishtinë, i dyshuar për përfshirje në një rrjet të organizuar kriminal ndërkombëtar që merrej me kontrabandimin e migrantëve drejt vendeve të Bashkimit Evropian.
Sipas njoftimit të Policisë, operacioni është realizuar më 3 nëntor, nga Sektori i Hetimeve i Departamentit për Kufi, në bashkëpunim me Agjencinë e Kosovës për Inteligjencë (AKI) dhe me autorizimin e Prokurorisë Themelore në Prishtinë.
I dyshuari, shtetas kosovar, dyshohet se kishte rol në rekrutimin e shoferëve, të cilët më pas pajiseshin me automjete, para dhe harta të sakta të lëvizjes për të transportuar migrantë ilegalë.
Sipas hetimeve, shoferët merrnin detyrën për të bartur migrantë nga kufiri i Turqisë drejt Greqisë, fillimisht në Selanik, për të vazhduar më pas transitin përmes shteteve të tjera drejt Evropës.
Gjatë operacionit, policia ka bastisur edhe banesën e të dyshuarit në Prishtinë, ku ka gjetur dhe sekuestruar 1 mijë e 760 euro para të gatshme, si dhe fletë-transaksione të ndryshme financiare.
I dyshuari është intervistuar në prani të avokatit mbrojtës, ndërsa me urdhër të prokurorit është dërguar në ndalim policor për 48 orë.