I njëjti numër fature, e njëjta datë, e njëjta kompani dhe i njëjti muaj pune. Por kur dokumentet vihen përballë njëra-tjetrës, del një ndryshim që kërkon shpjegim.

Sinjali ka siguruar dy dosje që lidhen me faturën nr. 121/26, të lëshuar nga kompania “E-Commerce Kosova” Sh.P.K. për shërbimet e pastrimit në objektet e Komunës së Prishtinës.

Në njërën dosje, fatura figuron në vlerën 47,716.59 euro.

Në tjetrën, po e njëjta faturë, me po të njëjtin numër dhe datë, figuron në shumën 49,498.59 euro.

Diferenca mes dy versioneve është saktësisht 1,782 euro.

Por mospërputhjet nuk ndalen te shuma.

Dokumentet e analizuara tregojnë se dy dosjet kanë numra të ndryshëm protokolli dhe janë proceduar në data të ndryshme. Në njërën figuron data 31 gusht 2026, ndërsa në tjetrën 2 shtator 2026.

Në dosjen ku shuma arrin në 49,498.59 euro gjendet edhe një aktpërcjellje, ku përsëritet e njëjta vlerë.

Dokumentacioni lidhet me punët e pastrimit të realizuara gjatë muajit gusht në objektet komunale.

Raporti i punëve evidenton gjithsej 45,070.12 metra katrorë, prej të cilave 34,371.12 m² sipërfaqe të brendshme dhe 10,699 m² sipërfaqe të jashtme.

Në listë përfshihen dhjetëra objekte komunale, ndër to objekti i vjetër i Komunës, Inspektorati, Arkivi, bibliotekat, bashkësitë lokale dhe institucione të tjera.

Krahasimi i dokumenteve tregon se në disa pozicione ka dallime në sipërfaqet e faturuara, të cilat reflektohen edhe në shumën finale.

Një dokument përfundon me 47,716.59 euro.

Tjetri me 49,498.59 euro.

Në materialet shoqëruese paraqiten edhe pretendime se të njëjtat komunikime elektronike janë përdorur në dosje të ndryshme, por me protokollime të ndryshme.

Në dokumentacion figurojnë Gëzime Pacolli, në cilësinë e menaxheres së kontratës, dhe Donat Abazi, si mbikëqyrës i saj.

Në shënimet që shoqërojnë materialet pretendohet se Abazi ka dhënë dorëheqje pas presioneve që lidhen me kontratën. Sinjali, megjithatë, nuk e trajton këtë si fakt të provuar, pasi dokumentet e siguruara nuk mjaftojnë për të vërtetuar arsyen e dorëheqjes.

Po ashtu, nga dokumentacioni i analizuar nuk mund të përfundohet se janë paguar dy herë para për të njëjtën faturë dhe as se ndryshimi prej 1,782 eurosh përbën domosdoshmërisht keqpërdorim.

Por një fakt mbetet i qartë dhe kërkon përgjigje:

Fatura nr. 121/26 paraqitet me dy shuma të ndryshme.

Tani Komuna e Prishtinës duhet të sqarojë se cili është versioni përfundimtar i faturës, pse shuma ndryshoi, pse dokumentet kanë protokollime të ndryshme dhe cila prej tyre është proceduar apo ekzekutuar për pagesë.

Sinjali do të kërkojë përgjigje nga Komuna e Prishtinës dhe kompania “E-Commerce Kosova”, ndërsa dokumentacioni tjetër që lidhet me këtë kontratë do të vazhdojë të analizohet.