Një mosmarrëveshje për trashëgiminë pasurore ka përfunduar me kërcënime dhe arrestim në Malishevë, ku një nënë dyshohet se ka kanosur me vrasje djalin e saj, ndërsa ky i fundit e ka denoncuar rastin në Polici.
Burimet e Gazetës Sinjali bëjnë me dije se gjithçka ka nisur nga një konflikt mes nënës dhe të birit lidhur me trashëgiminë familjare, i cili ka marrë përmasa serioze pas fjalëve kërcënuese që dyshohet se janë përdorur gjatë përplasjes.
“Ose ke me më vra, ose kam me të vra”, dyshohet të ketë qenë kërcënimi që nëna ia ka drejtuar djalit të saj.
Përballë këtij kërcënimi, djali ka vendosur t’i drejtohet Policisë, duke e denoncuar nënën e tij.
Pas raportimit të rastit dhe ndërhyrjes së autoriteteve, nëna është arrestuar dhe është dërguar në mbajtje për 48 orë.
Kështu, një mosmarrëveshje për trashëgiminë, që kishte përfshirë dy anëtarë të së njëjtës familje, ka përfunduar me arrestimin e nënës pas denoncimit të të birit.
Rrethanat e plota të rastit pritet të sqarohen gjatë procedurave të mëtejshme hetimore.