Zbulohen 50 mijë euro të fshehura në autobusin Itali–Kosovë në Merdare

Dogana e Kosovës ka zbuluar 50 mijë euro të fshehura dhe të padeklaruara gjatë kontrollit të një autobusi në Pikën e Kalimit Kufitar në Merdare.

Sipas njoftimit të Doganës, rasti ka ndodhur sot, më 4 tetor 2026, kur zyrtarët e Sektorit Antikontrabandë, së bashku me oficerët doganorë dhe policorë, kanë kryer kontrolle të detajuara në hyrje të Republikës së Kosovës.

Gjatë kontrollit të një autobusi të linjës Itali–Kosovë, në bagazhin personal të drejtuesit të autobusit janë gjetur 50 mijë euro, të cilat nuk ishin deklaruar pranë autoriteteve doganore.

Dogana rikujton se, sipas Ligjit për Parandalimin e Pastrimit të Parave dhe Luftimin e Financimit të Terrorizmit, çdo person që hyn ose del nga Kosova dhe bart 10 mijë euro ose më shumë, është i obliguar që shumën ta deklarojë me shkrim pranë zyrtarëve doganorë, duke paraqitur edhe burimin e mjeteve.

Dogana e Kosovës ka theksuar se mbetet e përkushtuar në zbatimin e ligjit dhe parandalimin e bartjes së padeklaruar të mjeteve monetare përtej kufirit.