Dogana e Kosovës, në bashkëpunim me Policinë Kufitare, ka zbuluar substancë të dyshuar narkotike gjatë një kontrolli në Pikën e Kalimit Kufitar në Vërmicë.
Sipas Doganës, gjatë kontrollit të detajuar në vijën e dytë të kontrollit, në çantën e krahut të një udhëtari është gjetur një qese plastike me substancë të dyshuar narkotike të llojit marihuanë.
Një sasi tjetër e substancës së dyshuar është gjetur edhe brenda një kutie metalike.
Personi, shtetas i një vendi fqinj, është ndaluar dhe arrestuar nga autoritetet kompetente, ndërsa rasti i është dorëzuar institucioneve përkatëse për procedim të mëtejshëm.
Dogana e Kosovës ka bërë të ditur se kontrollet e përbashkëta me Policinë dhe institucionet e tjera do të vazhdojnë me qëllim të parandalimit të kontrabandës dhe trafikimit të substancave narkotike në kufi.